|
25/06/2008
|
|
|
|
|
|
|
قالوا وقلنــــا...
قالو: مشكلة
بوسليم انحلت
قلنا: كويس بس كيف
قالو: بيعوضوا الضحايا وبيحاكموا الجاني
قلنا: والله الا ممتاز هالخبر، بس منو الجاني
قالو: المرجوم خيري خالد والمرجوم عامر المسلاتي
قلنا: وعبدالله السنوسي والقدافي اللي عطي الأوامر؟
قالو: تي هوا القدافي يقدر يطق فيه حد؟
قلنا: امالا شن الفايدة ؟ معناها المشكلة منحلتش !
قالو: احمد ربي اللي بيعوضو العباد
قلنا: والام اللي كبدها انحرق على ولدها ، بينفعوها فلوس؟
قالو: مش خير من بلاش
قلنا: تي هما علاش حبسوهم وقتلوهم أصلاً ؟
قالو: تو اقعد غير انبش على اللي فات، ماهو اللي فات مات يا راجل !
قلنا: كيف اللي فات مات؟
قالو: ماهو توا تغير الحال
قلنا: والله الا طمنتني شوي حسّك، شنو اخيراً القدافي بيطلع ويسيبها بروحه؟
قالو: لا ياراجل، لاكن بيديروا دستور جديد باش تتنظم الحكاية
قلنا: تهو المهزلة اللي داروها تسميها دستور؟
قالو: اوخيره شنو فيه ؟
قلنا: ياحسرة على دستورنا الاصلي متاع زمان السمح
قالو: تغير فهمنا رانا قعدنا زي الأطرش في الزفة
قلنا: عمرك سمعت فيه دستور يقول فلان قايد ورمز وراهو خط أحمر هوا واولاده؟
قالو: وين نندرو عليه واحنى شن عرفنا
قلنا: كانكم قريتوا دستورنا السمح الأصلي متاع زمان واللي احني مانعترفوا
الا بيه راكم عرفتوا الفرق
قالو: وشن الفرق ؟
قلنا: فرق كبير بين دستور كتبوه ناس مباركة ويخافو ربي، يمثلو كل مناطق
ليبيا، وبين اللي بيفرضه عليكم القدافي فرض
قالو: والله شوقتنا، احكيلنا عليه شوي تربح
قلنا: دستور متاع زمان كان يحفض لكل واحد حقه وفيه فصل بين السلطات
قالو: سلاطات؟؟؟ شن دخل الماكلة في اللي تقول فيه؟
قلنا: تي لا، سلاطات شنو؟ سلطات معناها السلطة التشريعية والتنفيذية
والقضائية
قالو: وهادوا متاع شنو؟
قلنا: فيه اللي متخصص في اصدار القرارت وفيه اللي مسؤل على تنفيدها والسلطة
القضائية مستقلة بروحها، معناها القاضي لما يحكم ميخافش من حد
قالو: وشنو الفرق مع توا ؟
قلنا: كانه القضاء مستقل زي زمان راهو شهداء بوسليم منحبسوش أصلاً، لأنهم
محبوسين من غير تهم كلهم
قالو: ولنفرض انها صارت ؟
قلنا: كان صارت معناها المسؤول لازم يتحاكم بعدل وبنزاهة وياخد عقابه مهما
كان.
قالو: معقولة يقدروا يديروها ؟ معناها زمان فيه حرية
قلنا: زمان كانت حرية الصحافة والتعبير بكل أشكاله
قالو: أي حرية كان هوا الملك يملكها كلها ؟
قلنا: تغير منين تجيبوا فيه هالكلام ؟
قالو: هدا اللي سمعناه
قلنا: لو تعرفوا كيف كانت الأمور في ليبيا وتسمعوا سيرة هالرجل الطيب
الصالح
قالو: فسرلنا مفهمناش
قلنا: مرة الملكة فاطمة ربي يطول في عمرها احتاجت فلوس للعلاج وهيا في
تركيا لين اجتمع البرلمان باش وافق عليهم ، بشرط يردهم الملك من معاشه
بالأقساط
قالو: معقولة ؟؟؟ وقداش كانو تقريباً الفلوس اللي بيردهم من معاشه؟
قلنا: حدود الفين دولار
قالو: معقولة يا راجل ؟ معناها الملك مسكين ماكانش يملك حق !
قلنا: رحمة الله عليه لما صار الانقلاب لقو الخزنة متاعه منفّضة
قالو: ممكن كان مهربهم معاه لما طلع؟
قلنا: رحمة الله عليه لما سمع بالإنقلاب كلم المحاسب متاعه، قاله يا ابني
رجّع باقي الفلوس اللي معاك لخزينة الشعب، لأنهم مخصصاتي السياحية لما كنت
ملك، بس انا توا معادش ملك وهادو ماعادش من حقي
قالو: معقولة فيه راجل بهالنزاهة هادي؟
قلنا: مازال شن ريتو، ياريت تولي هاديك الايام وتشوفوها كيف كانت، قولو
آمين
قالو: هدا كلام قوي ويبي تهدريزة طويلة
قلنا: باهي خلي نجيب سبيسي غرياني من الدكان ونجي نكملوا تهدريزنا، هي
السلام عليكم تو...
أبوجرد
|
libyaalmostakbal@yahoo.com