25/05/2006

خراريف طويسة شاهي العشيه (2)

قول يا سيدي بن سيد وصلوا للحوش ولقوا هاضاك (ذاك) الراجل بعد ما دقها (ملأ معدته) بازين وتقرع السعاده (بيبسي ليبي (متمدد وعود نعناع في فمه ينظف أسنانه مما تبقى من آثار اللحم وقرون الفلفل ويتفرج ع التلفزيون ..المهم دقوا الباب وطلعلهم صاحبنا ...

قالوله: نحنا وزراء الملك، والملك يبيك (يريدك) تفسرله الرؤيا

قاللهم: باهي (طيب) لكن نابيدي (أنا) ما انفسرش لحلام..

قالوله: سمعنا إنك اتفسرالرؤى المنسيه .. فتعال معانا بالهداوه خير ما أنجيبوك بالغصب !!

قاللهم: أنا ما فسرت الرؤى العاديه يابال (مابالك (المنسيه!!!

اطقروه (ضربوه) واربطوه وبعد ما عرفهم أنهم ناويين عا السيه وعيونهم انحمرن (صارت حمراء)  ..!!هدرز مع روحه هممم (تحدث مع نفسه) وقال: هي خاربه..  خاربه ..الخ..  قاللهم: باهي أساع (سوف) نمشي معاكم ..غير فكوا الحبل واطلقوني...

ضحك الوزراء وقالوا: همممم و الله هاذيك (تلك) العزوز (العجوز) عارفته زين .. إيخاف ما إيتحشمش..

المهم وهم ما شيين خطموا (مروا) بغرفه مهجوره علي حاشة - حرف - (بجوار) الطريق..

قاللهم: نا دخيلتكم (أرجوكم) بطني (.......) نبي ننزل!!

قالوله: باهي غير سقد روحك (عجل)..

قاللهم: لا ما عليكم نص ساعه وانجيكم  ...

المهم خش (دخل) الدويره (الدار) بيش يقضي حاجته عيطله (ناداه) حنش (ثعبان) من فوق السقف: يا آدمي
رد عليه : شن تبي ؟؟!!
قال: إيش جابك (ماذا أتى بك) مع الوزراء هنا ...؟؟ هللي (الذي) نعرفه إنك إنسان منتف (معدم ..!! (

حكاله قصته كلها من طق طق لعند السلام عليكم ..!!

الحنش (الثعبان) قال: نابيدي (أنا) نعرف شنو حق - شبح - (رأى) الملك  ..  !!

قاله: باهي شنو حق - شبح - (رأى) ..  ؟؟

قال: بس عندي شرط ..  !!

قاله: باهي شنو هو شرطك ...

قال: هللي (الذي)  يعطيها لك الملك من هدايا انتقاسموها نا وياك النص بالنص !! ..
قال: تم الكلام موافق .. المهم سقد (عجل) .. !!
قال: ياسيدي بن سيد الملك رأى السماء تمطر ثعالب .. وتفسيرها أن العام الجاي عام مكر وخديعه.. فقوله (أعلمه) ينبه لروحه (لنفسه) ويرد باله (يحذر) ... !!
قال: الله يرحم والديك يا سي الحنش  (الثعبان .. !!(وأول ما يعطيني الملك شي أساع (سوف) أنجيك بيه طوالي..

رد (رجع) صاحبنا للوزراء ووجهه متعدل ومنبسط .. وقاللهم: ان شالله غير ما طولتش (لم اطل) عليكم .. !!

أسقدوا (تحركوا) واركبوا خيلهم ورجعوا للقصر ... وصبوا (وقفوا) قدام الملك (سلطان) وقالوله: الراجل هضا (هذا) حق - شبح) - رأى) رؤياك ويبي يفسرها لك .. ؟؟!!

وقف صاحبنا وقال: ياسلاطة السعاده .. هممم  عفوا .. أأأأ قصد ياسعادة السلطان .. أنت رأيت أن السماء تمطر ثعالب صح ولا لا ... ؟؟

قال الملك: إينعم نلقانك (أشهد) صدقت والله كلامك  صح ..! باهي شنو تفسيرها ؟؟
قال: العام الجاي عام مكر وخديعه فرد بالك وأنتبه كويس .. !!
قال الملك: يا فراشه (وضحنا في الجزء لول شنو هي الفراشه عدوا غادي واقروها) .... قولي لوالي الخزينه أن يعطي للراجل هضا (لهذا الرجل) مية (مائة) ناقه ومية راس م البقر وخمسين كيلوا ذهب ومية ألف درهم و ..و...و..

قال صاحبنا: وخمسين قصعة بازين ..!!
قال الملك: لك ما أردت !!

وفي طريق العوده ومعاه قوافله وعطايا الملك ... خطم (مر) صاحبنا بهاذيك (بتلك) الدويره (الدار) المهجوره وتما اصبح) يتمتم مع روحه) ( يحدث نفسه).. توا أنا إنسان والحنش (الثعبان) حيوان ... شن يبي يستفيد من هللي (هذا الذي) نبي نعطيه له ..!! أحسن حاجه نرخيه) أتجاهله)

وفعلا رخاه...  ورجع لبيته وبدأ في القصعه الأولى من البازين ...! و مرت الليالي و الأيام و الشهور .. و بعد 12 شهر على التمام والكمال و بعد أن انتهى من  49 قصعه بازين .. طق الباب ..!!

نتابع الجزء الثالث بعد صلاة المغرب إن شاء الله