- آه .. الدوة اليوم علي أني ....
- وين تمشي من الجماعة يا صاحبي ...
- اماله شنو... حتى أنت خوذ نصيبك من القرمة
- لا...هو تبي الحق مش ناكرها ...
- والله يا جماعة ... نقولها بصوت عالي ... أني مولود فى الجزائر..
- أني والله العظيم نفتخر بيها وحتى حناي شلحية من غادي وأمي مش من
مصراته...ونتكلم فرنساوي
- إسمع أني نعرف حرمة الراجل فى شخصه ...
- يا جماعة ... الجزائر ماهياش تونس ...
- أني نقول مافيش فرق تونس وإلا الجزائر وإلا حتى بنجلاديش ..
- صح يا جماعة الواحد مولود برة شن ذنبه ...
- إيه ... إيه تو وكانه مولود فى كندا وإلا فرنســا ...
- لا ... لا هذوكاي ما تتكلمش عليهم ... هذوكاي برستيج ...
- لا ... ويقولك ولد الطليانية وإلا المالطية ...
- يا جماعة نقطع عليكم معليشي سامحوني .. ما حد كلمنا على ليبيين المشرق
العربي ...
- أسكت .. أسكت ... هذوكاي جو بدري وتليبو بسرعة
- شوف هذوكاي جو بدري صح ووتاهم الظرف...
- آهو ... نقولك علاش ...
- خليه ... خليه يكمل ...
- أيوه ... أيوه .. ترى ثقفنا يا مولانا ...
- أني قتلك ... هذوكاي جو بدري وتريسوا من الأول ...
- والله صح كلامك ... لأن البلاد كيف ناتقة هذاك التاو ..
- يا صاحبي .. أنت كل شي تعرفه...
- المفروض كلنا نعرف .. وهذا جزء من التاريخ ...
- يا جماعة هالناس ما سمعتش من يتكلم عليهم ...
- اسمع نقولك حاجة .. اللي يبحث يعرف ...
- تو يا جماعة شنو هو خلاصة الموضوع ...
- الموضوع يا فالح وخلاصته ... هو الصدق والولاء ...
- شن قصدك بالــــولاء ...
- الولاء لليبيــا يا شاطــر ...
- إيه ... إيه الولاء وقبله الإنتماء حتى وكان الواحد مولود فى المريخ
