اكليمات فيهن الشفا

 د. ولد البحر 

امي ؤ امك ؤ حني ؤ حنك واكيد خالتي ؤ خالتك تمر بها ايام ... وهنا اقصد اي واحدة من هن تستخدم فيها  لوصف الحالة التي تعانيها ... مصطلح" نووي" ... اسماه  " اه يا نا يا كلي" وهذا المصطلح النووي يدل علي ان كل ذرة من ذرات جسمها تشتكي بل تذهب بهذه الشكوى الي حال الروح وما وراء الروح وعالم الميتافيزيقيا " اي علم ما وراء المادة... او ما وراء الوجود" وبهذه الجملة الخطيرة والشديدة البلاغة والتي تصف بها حالها, ما يكون منها الا ان تأخذ محرمتها " ولا اعرف اصل كلمة محرمة, ربما لها علاقة بالحريم..... وتدلع ... بلفظ امحيرمة... كما تقول امهاتنا... وتصنع من انواع مختلفة من القماش ... اكثرها إغراءا ... رمش العين ... ؤ شاش اليبرة... ههههههه "  وتلفها بطريقة فنية تستعمل فيها مفتاح ذكر"... مفتاح راجل يعني ..." ليساعدها في لوي المحرمة بشكل محكم.

 هذه الالام الروحية والجسدية, التي تتجمع وتتوحد وتظهر علي احدهن بصداع مفرط في الراس والذي يعرف بالشقيقة  وربما جاء هذا اللفظ من الشق حيث ان الالم يكاد يشق الرأس ... شقا... يعني يقسمه نصين...  تكون سببا في دورانها في كل زوايا البيت دون جدوى. ولا احد من الموجودين يهتم كثيرا الا بوصف حبة اسبرو ..... او ان يطلب قهوة لنفسه او عشا او طاسة شاهي دون اكتراث بحالتها وهي تدور المسكينة دورة الراحة. وما ان يدخل لحويج ويراها في هذه الحال ... حتى يغازلها....." النم .... مش ئغازلها"..... بلسانه الاحد من المبرد ... تي مازلتي اتحسي في راسك من الصبح ... ديما سريب هالراس ؤ سطاره  " بيني ؤ بينكم الحاج ئدور في سبلة الراقدة هالريح بيش يخذ عليها مصرية ... ؤ راهو حتي السوريات ليام هذين سوقهن متحرك. حتى كانه مش كيف سوق المصريات  والمغربيات لكن ... مش بطال يعني ... ويعني ايضا متقوي سعدهن"  تقفز المسكينة  من مكانها متظاهرة بالتحسن ...

امي او امك , خالتي او خالتك, حني او حنك:  لا لا تو انحس في روحي شاكرة حالي غير انسيت انحول المحرمة وتقول في قرارة نفسها " عطبك على يوم امشوم, يوم زفتي لك...,عمرك  ما جبرت خاطري بأكليمة ؤ لا حتى بأردا عمل رخيص البضايع"  كلمات الحويج اللي اتقول رصاص اتزيد في الالم ؤ ما يسكنن الا في وسط كنينها.

يحكي ان رجلا ليبي من القدامى نظر الي زوجته  فضحكت" اضحكت امسيكينة  والله ما دارت حاجة بطالة...اضحكت له"  فما كان منه الا ان اخذ سكينا وقتلها فبعد ان سيق للمحكمة  ووقف امام القاضى سأله: 

القاضي: لماذا قتلت زوجتك

الحاج الليبي: والله يا سي القاضي تضحك للرجالة قتلتها 

القاضي: اي رجالة؟  مسكتها تضحك مع حد

الحاج الليبي: لا والله الكذب حرام

القاضي : اي راجالة اضحكتلهم ؟

الحاج الليبي: اضحتك لي نا ... كلام اصغيير يا سي القاضي مش راجل مالي عينك نا والا كيف ...... اضحكتلي قتلتها ..... شنو...؟؟؟

فحكم له القاضي  بالبراءة واعتبرها مسألة دفاع عن الشرف " علما بأن القاضي ليبي ايضا"

 تستمر الشقيقة وتستمر الالام وكما يقال جبر الخواطر على الله, ولمداوي ربي. ولا احد يهتم

ملت المسكينة من اخذ الاسبرو وادوية فقر الدم كما قال لها الدكتور الباكستاني" انت فيه دوخ... انت فيه  فقر دم"

ترد على الدكتور تي اين فقر دم تي نا عندي الهم  حشاك.. كلمة حشاك هذه لا يفهمها الدكتور الباكستاني.

لا الحاج السانه رطب ؤ لا  دوا  الدكتور الباكستاني ينفع...., ايش الدبارة.

ؤ لا الاه تكفي           ؤ لا الندم ينفعها

ام العز عندها الحل خبيرة في شئون الصبايا  ؤ دواهن" خريجة جامعة ارحم من قرا ؤ ورا صحيح مش لعب" مرا  امدقلة اتحطها على الجرح يبرا. ام العز هذه هي المرا الليبية  الوحيدة التي نجت من محاولة موكدة.... وسع بالك مش محاولة اغتيال ...محاولة زيزة راجلها عليها؟؟؟؟.. وبصراحة اتمنى ان ئحطوها لنا ممثلة ليبيا في الامم المتحدة  او المتخذة " وخيذة عدوك واللي يكرهك"  بدل هالفقوم   بوزيد دوردا. 

بعد ان سمعت بشكوى صويحبتها المتكررة من الالام " يا نا يا كلي" والشقيقة ارسلت اليها واعتدت لها طنجرة امقطع" رشدة برمة" بالقديد اللي كبر الوحدة منه اتقول صباط  اعويل فايحة من الروح للروح فطور ضحى . ما ان دخلت الحويجة  حتى استلمتها ام العز واتجهت بها نحو وسط الحوش حيث يوجد هناك كانون فحم يستعر كأنه نار سقر التي لا تبقي ولا تذر. اجلست ام العز لحويجة امام الكانون واتت بمنشف وضعته على رأسها ثم وضعت في تلك النار كمكومة شعر كبيرة وقالت للحويجة

ام العز: رد بالك الدخان يمشي هك والا هك لازم هضا كله ئخش في مسلانك"في جواجيك" غطي راسك بالمنشف على الكانون ؤ تنفسي.

انبعث في هذه الاثناء دخان كثيف. الحويجة تشربت دخان الشعر واخذت تسعل" اتكح" قريب اعيوناتها اطلعن اخذث هذه العملية دقايق معدودة, وما ان نزعت ام العز المنشف وقالت خلاص, حتى كادت الحويجة تلفظ النفس الاخير.

 الحويجة: احيي من حياني.

ام العز: تو اتشوفي روحك بعد هالدبارة هذي ضربة ضربة للشقيقة.

تنفست الحاجة الصعداء ؤ شهدت ؤ تحمدت و استغفرت... ووضعت قعصة لمقطع" وضع  فعل مبني للمجهول يقدر فاعله تقديرا وهي ام العز .. اما التاء تعود على قصعة لمقطع اللي على كيفك".

ؤجيتك من المنقار امقطع       سكران ؤ ضارنها امقطع

الحويجة: انعني ما نفقدك انشا الله في عراس البنات ؤ جيتك من الحج. 

ام العز: تي اين حج ... تي هضا مكمن داك انت ... نحن نبو ننمشو للحج ؤ هم يمشو المصر يزوزوا" يتزوجوا"... شكلك ما اتشوفي في شيء انت تبرمي في هالحوش ؤ خلاص شوفي المصريات ؤ هالسوريات كيف دايرات في هالدبزيوني... تو غير قدمي خالنفطروا ... وانحطوا طاسة شاهي ... ؤ بعدها دبايرك عندي.

اتت ام العز والحويجة على اقصيعة لمقطع , وما صاحبها من خبزة حوش مديورا" مصنوعة" من دقيق امخلط قمح ؤ فارينا ام العز غالي عليها الدنيا والالوان والتخليط واتحب اتفتلك كل شي حتى الشاهي .. يعني مرا امتاع حظ " او.. حز .. كما ينطقها الشياب الدلعبية". وماهي الا دقائق حتى اصبحت لقصيعة اثرا بعد عين.

الحويجة: سلمك والله طيابة امقطع نلقانك حانطة ؤكل ما لك حانط.

قربت ام العز اعدالة الشاهي   وفي طريقة فنية مستخدمة يدها. حفنة حشيشة خضرة وحفنة حشيشة حمرة .. ؤ ثلاث حفاني ؤنص سكر "كل هذه الحفاني في عين عدوك".. ام العز اتحب الطاسة لمخلطة ؤ عارفة لحويجة حتى هي اتحب الطاسة لمخلطة.. لكن ما تقدرش الطيب امخلط لأن الحويج ما يشربش الا اطويسة خضرة مرة. ؤ مرغمة " غصبا عنها" تشرب شاهي خضر الله غالب .. شن تبي اتدير مسكينة ... شن تبي اتدير...تشرب في امرارين  امرار الطاسة الخضرة وامرار العيشة لمغبرة اللي ما زارقة فيها سمس مع الحويج... اهو تصبر نين ئفرج ربي يأبفرج يا ابموت........؟؟؟؟؟؟؟؟

اما ام العز كما قلنا بعد نجاتها من المحاولة " الزيزة"التي اشرنا اليها سابقا وكسبت المعركة سياسيا بأنتصار ليس له مثيل.فهي تشرب اللي تبيه  و اتشرب شايبها اللي تبيه... وجاب... ياسي " كلامها سمح...ؤ حقيقة حانطة عطها ادعوة "..واصدقوا اللي قالوا عنك السان تركب احصان ام العز اركبت احصان واركبت حتى على شايبها.. ؤ دلدلت كرعيها.... ؤ حتى لما  اتبصر مع شايبها  واتقول:

ام العز : تو كيف ئصير فيك كان انموت

يجيب  شايب ام العز طوالي بدون تفكير:   انعني قبلك. اجعل يومي قبل يومك؟......ولذلك يمكن اعتباره كبير مؤسسي... "حزب انعني قبلك"  حزب اجتماعي صرف لا علاقة له بالسياسة ودهاليزها وربما هذا الحزب هوالحزب الوحيد المسموح للانضمام اليه جهارا نهار وعلي ومرءا ومسمع القذافي. ودولته الجماهيرية والتي تعتبر مقولة من تحزب خان اعتى الركائز  التي تقوم عليها.

بعد ان وضعت ام العز البراد علي نار الكنون " المستعر في كبد عدوكم واللي يكرهكم"

ام العز: اسمعيني جاي يا منجوها رد بالك من روحك راه انت شايلك تيار  الدروشة ؤ هالتيار في الزمن معش يلعب...شوفي شن صاير في هالدنيا .. في هالدبزيوني .. الدبزيوني هض معاد ئدس في حاجة ... غير نحن اللي ادجيجات.. لا غايب خبر مصر لخبر سوريا .. لخبر هالمغربيات... ارعي روحك راه اللي مايكل بيده مايشبع... اهو انقولك.

الحويجة مرا خجولة امسكينة  والتحشم اهو عاد كيف باقي خياتها اللبييات ؤ لما اتحشم من حاجة معينة تتظاهر بعدم الفهم.

الحويجة : والله يا ام العز ما فهمت منك حاجة ... لكن نلقانك امقطعك حانط  ....

 ام العز في شي من الغضب: تي انقولللها افطني الروحك واتقوللي امقطع.... خلي لمقطع عنك قطيعة تقطع لمقطع عالحسا........خل نشقوا برواحنا قبل ؤ بعدها تو انديرلك  جابية امقطع وازقبي فيها... دعاتك.

ام العز مرة اخرى: تو عليش كلمتك نا بيدي.

 الحويجة : عليش قابيتني غالية عليك ؤ كيف خيتك عارفتك ما اتوديلي الا كل خير ..

 ام العز: خلاص يا قليل العيب... مادمني كيف خيتك... اسمعيني وحللي وذنيك و عقلك ... قبل ما اتطيح الفاس في الراس واتجي على خشمك.

الحويجة في شيء من الغضب: سوووووووك لك يا بتي عليش اتجي على خشمي...حتى كان غالية على لكن كلامك هضا  حسه كدرلي  خاطري... ليه عليك هكي يا  باتي الستر... سمعي الملائكة خير... ليه يا عزوزة..اترعشي في الحمي...؟؟؟؟.

ام العز: كلا انت انعنك عقل عدوتي... تو نا بكية همك ... تبي تبرمي علي  ... لكن والله ماني امخليتك في عماك هض... يوجعك خاطرك والا قلبك.. امشي ملحي... حلى اعيونك يا مرا قبل ما ئشيلك السيل ؤ تغبي ما عاد اتباني... اهو قتلك. ؤ قولي ما قالتها ام العز نهار هضاك لمقطع...

ام العز: تقدريش اتقوليلي تو وجيعة الراس اللي ديما عندك شن سببها. او بعدين انت مانك امعدلة على روحك بكل و ديمة عاصبة هالراس ." اتقول منابك راسم... تعرفو المناب عاد... والا كيف" ؤ ديمة لبسة هالهلاهيل ؤ ضحكتك قليلة رايحة اتقول ميت كبيرك.   مووش هك راه العلل مووش هك. اشري روحك خير لك راه.

ام العز في ايضاح مستميت: تو تقدريش اتقوليلي حاجك هض كم مرة مشى للحج.

الحويجة في رد خاطف: تسعة اثنين حج ؤ سبعة عمرة.

ام الغز:اكيد كلامك هض و الا هو اللي قاللك.

الحويجة في اجابة مطمئنة: لا لا عاد هضى حج مش لعب.

ام العز: معناها يا حنا بعد ما اتروحي انصبي صدوق... ؤ تو انجي نندب امعاك.. تي انت مش لمية  ماشية من تحتك .. تي انت اتشلبكي فيها ؤ مانك جايبة خبر.

الحويجة وقد طار صوابها: انشا الله غير الحاج مش متزوز علي وحدة من هللي طريتيهن بدري حيه علي ؤ على امعيشتي السودة.

 ام العز: ايو صار عارفتيني بدري عليش نحكي واتلعبي واتقولي امقطع ما امقطع ...

في سرعة البرق تناولت ام العز كاس لمية وصبت قليل من الماء في يدها ورشت به الحويجة على وجهها في شكل مفاجئ " اسلوب ليبي قديم .. اعتقد انه موروث من جداتنا لولات صبايا  التحنو والمشواش  لما وحدة يهجم عليها  نمر  والا  ديناصور ويسخدم لتفادي اثر الرعايش والفجايع.. يهدف الي اعادة تنظيم دوران الدم في الجسم ... عموما نقطة جدير بالبحث العلمي من قبل اهل الاختصاص... والله انكلم فيكم جد".

ام العز في ضحكة مطمنة: لاتخافك لاتخافك... هضا اللي ما نبوش ئصير ؤ هضا عليش كلمتك.

الحويجة: شنو الدبارة يا خيتي  شن الدبارة ...

 ام العز: اول مرة الحويج صحيح مشا للحج مرتين .. كلا العمرة واللي قاللكم عليها والله ما خزرها ؤ لا مشى كلا  ثلاث مشيات جبت خبرهن وكلا لربعة لخرات عاد نبيك اتجيبي الباشبورطو ... بيش انتأكدوا منهن.

 الحويجة: ئياااااااااااااااه نريته  حتى العويل لما ئقولوا له هيت خال انقصولك في الطيارة ئقوللهم لا لا تو انقص ابروحي ... ؤ مائردش حد يمشي معاه للمطار على حد رايه بيش ما ئودرش اجره ما يبش الناس تعرف. صار هك يا احويج ... لكن تعرفي ما انريدش نظلمه الحويج ما حتى رضاها في بعد هالعشرة.

 ام العز: خرفي  ئ والله خرفي ... تي هضوم بزقلليف " كيف يلقوا خشرة .. ينسوا العشرة"خليك خليك انحق فيها ؤ هي جاية على منزك"خشمك" خليك يا حنا في العشرة والسواري والسراويل العربيات ؤ في المسك ؤزيت الراس لمقطر والسواك و الحنة. ؤخلليه عاد هو يعمد شور زمزم السمحة اللي اتفحفح.

 الحويجة: تي زمزم كيف اتفحفح تي ماهي بيرامية.

 ام العز: زمزم هذي اللي تعرفيها انت بير  امية؟؟؟...... زمزم اللي يعرفها الحويج هذي وحدة طليانية قالوا.. قالوا ارفعي عني...قالوا مولودة في ليبيا قبل ما ئلزوا الطليان بشوي..قالوا احويجك هض هللي اتحقي فيه قارن حجاجاته اتقول حجاجات بنداق ... قالوا الضحكة السمحة اللي اترن ما تسمعيها منه الا غادي... ؤ لما ئتعدل عنده الكيف يبدا ئطقلها ؤي ئغنيلها بالعلم.

الحويجة: ئغني المن بالعلم.

 ام العز: ئغني الزمزم بالعلم... شنو ئغنيلك انت.

 الحويجة: اصير هالحديث ... هكي يا احويج ؤكيف صار فالحجة. ..نا   ريتاااا... مرة في المربوعة كانوا عنده جماعة بعد جيته من العمرة اخر مرة مشى... مشيه على وجهه... قبل ما اندق الباب نعطيه القهوة نسمع فيهم يضحكوا ؤ حس واحد فيهم يسأل فيه ئقوله .. شربت من زمزم يا احويج...ونسمع في الحاج يضحك ويقرقر  ؤ عمري كله ما اسمعته ضحك هذيك الضحكة.. ؤ هو ئقول وحياتكم.. ما اتصبلي الا بأيديها زمزم.

 الحاجة مرة اخرة: تعرفي ضحكت ؤ قلت الحاج شوره دايخ شن زمزم اللي اتصبله بايديها... مش خاطرلي عاد يظهر منه هالعمل. والحجة خارمها من زمان.. مش خاطرلي قال ماشي للحج ؤ هو واخذ وجهه امعا السيبات في طاليا هذك... تقدر تقدر يا احويج......لكن اهي جمتي انقصها كان ما اخلصت منك تالت وامتلت... تو انوريك..نا...نا... اتدير في هالعمل.. امخلليني نبرم كيف الناقة لمغدودة" المنحورة"...وانت اتغني بالعلم...ؤ وين في طاليا هنك.؟؟؟؟. 

ام العز: ئوا عاد كوني في روحك...ما اتخللينيش نندم عد اللي نورتك...تو عاد يا حنا الشقيقة ؤ درنالك دواها لمجرب مش لعب ..هذي وحدة معش نبي نسمعك تطريها لي بكل...والحاجة لخرة صندوقك السحارية بو سبع رنات هضك بأجماده بالدبش اللي فيه يا حنا  فيه ولد عات بو دجاجة داير متحف قالوا اسمه جادو..... عطيه له   بالسراويل العربيات والسواري. والمسك والبخور ؤ حتى اصوار الفضة  عطيه  له  خليه ئحطه عنده في هضك المعرض السمح وئجو لفرنج ئتفرجوا عليه.

الحويجة: تو هبلة والا ابعقلك تبيني انحط صدوقي ؤ سوارييي تفرجة شن على اكبر منها.

ام العز: تي مش قتلك انعنك عقل العدو... تي الحاجات هذي عند الناس اللي تفهم برا حاجة كبير بكل هضا ئقولوا له تراث.... والله شنو ارفعي عني..... المهم حاجة كبيرة. ؤ قالوا الولد هضا  يخبر في هالتراث واللي ئقولوا عليه.. قالوا ئجوه الفرنج والعرب من قريب البعيد. حتى نا نبي انقول الشايبي  يمشيله ئجي ياخذ السدة.. بعد عاد الشوييب ما شرا لي دار نوم تبرم ؤ بالضوايا من كل جيهة. عاد هضوم كان ما عطيناهم نحن الدبش ؤ شجعناهم من يعطيهم.

الحويجة: يا ام العز تو مانبيش فقي شاطر بالك ئسبب لي بالك ئعاوني على هالمنجوه.

ام العز:  ؤ حياتك جربتهم كلهم .. والقيت اللي ما يكل بيده ما يشبع.. هضا شي في يد كانك باكيه همك واتريدي تزي واتشوفي ايام اكويسة اشقي ابرحك ؤ كان عاد تبي تعملي نيسة انت ؤ دبارك... ؤ هو حققك علي نورتك ؤ وريتك.. ان ما هضا مصر راهي بلا  تشييرة.

وما هي الا فترة قصيرة , انضم فيها الحويج الي  حزب انعني قبلك واصبح يشرب الشاهي لمخلط ؤ ما يحلف الا ابراس لحويجة.  ورغم حرص  ام العز وتوجيهاتها الا  ان الارادة كانت جامحة لدى لحويجة في التغير من واقعها والا لما استطاعت اتشرب الحويج الطاسة لمخلطة  و لما اتشترالها دار نوم تبرم حتى هي بالضوايا من كل جيها...ؤ لا شالها ليطاليا عالجت على ركبيها... واصبغت شعرها... ؤاتخليه ئقول ... اجعل يومي قبل يومك. ووفاءا من الحويجة كلما وجدت نفسها في سعادة تدعي لام العز.. بالاتي:

لحويجة: يالله يا ام العز سلم ضناك واسحن كلاوي اعداك..

 والخلاصة في الارادة .. هل فهم الكلام من اليمين الي الشمال ام العكس انت حر.

وانشا الله كلنا ما عندنا سو

د. ولد البحر